بۆ تاوتوێکردنی دۆخی نۆرینگەکان سەرۆکی سەندیکای کارمەندانی تەندروستی کوردستان سەردانی گەرمیان دەکات بەمەبەستی بەدواداچوونی ئەو کێشانەی پەیوەست بە نۆرینگە ئەهلییەکانی کارمەندانی تەندروستی هەن، سەرلەبەیانی ئەمڕۆ د. محەمەد ئازاد- بەڕێوبەری گشتی تەندروستی گەرمیان، پێشوازیی لە جەبار محەمەد- سەرۆکی سەندیکای کارمەندانی تەندروستی کوردستانى کرد. لە کۆبوونەوەیەکدا لە دیوانی بەڕێوبەرایەتی گشتی تەندروستی گەرمیان بە ئامادەبوونی سەرۆک و ستافی لقی گەرمیانی سەندیکای کارمەندانی تەندروستی و ژمارەیەک لە لێپرسراوی بەشەکانی دیوانی بەڕێوبەرایەتی گشتی تەندروستی گەرمیان، گفتوگۆ کرا لەبارەی ئەو کێشانەی پەیوەست بە کارکردنی کارمەندانی تەندروستی لە نۆرینگە ئەهلییەکاندا هەن و لەوبارەوە جەخت لە چارەسەرکردنی کێشەکان بە گوێرەی یاسا و ڕێنماییەکان کرایەوە. پاشان پێکەوە سەردانی ئیدارەی گەرمیانیان کرد و لەگەڵ بەڕێز جەلال شێخ نوری- سەرپەرشتیاری ئیدارەی گەرمیاندا کۆبوونەوە. لەکۆبوونەوەکەدا هەمووان هاوڕابوون لەسەر ئەوەی کار بە یاسا و ڕێنماییە بەرکارەکان بکرێت، لەوبارەوە دەبێت دەرمانخانەکان تەنها لەلایەن پزیشکی دەرمانسازەوە بەڕێوەببرێن. هەروەک کارمەندانی تەندروستی بە پسپۆڕییە جیاوازەکانەوە، ڕێگەپێدراون کە نۆرینگەی تەندروستییان هەبێت، بۆ ئەم مەبەستەش دەبێت ناونیشان و جۆری ئەو کارەی پێشتر ئەنجامیانداوە بەناوی دەرمانخانە، بگۆڕن بۆ نۆرینگە. بەشداران جەختیان لەوەکردەوە، ئەو یاسا و ڕێنماییانەی لەئارادان، بەمەبەستی ڕێکخستنی کاروبارەکانی پەیوەست بە دەرمانخانە و نۆرینگەکانە و پێویستە بەدرووستی جێبەجێ بکرێن، چونکە لەپێناو بەرژەوەندیی گشتیدا دەرکراون، هاوکات ڕەچاوی مافی کارمەندانی تەندروستی پەیوەست بەم بوارە دەکرێت. لەبارەی مۆڵەتی نۆرینگە و دەرمانخانە ئەهلییەکانیشەوە، جەخت کرایەوە لەوەی کە دەبێت هەموو ناوەندێکی ئەهلی کە کاری تەندروستی دەکات وەکو نۆرینگە،دەرمانسازان، چاویلکەسازان، دانسازان و… هتد، مۆڵەت لە بەڕێوبەرایەتی گشتی تەندروستی گەرمیان دەربهێنن و بۆ ئەم مەبەستەش لە هەفتەی داهاتووەوە ڕێکارەکان دەستپێدەکات.




بەڕێوبەرایەتی خۆپاراستنی تەندروستی گەرمیان